तालुका प्रतिनिधी : राहुल जयकर
यावल ग्रामीण रुग्णालयात गेल्या दीड वर्षापासून एक्स-रे मशीन बंद अवस्थेत असल्याचा गंभीर प्रकार समोर आला आहे. यामुळे रुग्णांना अत्यावश्यक असलेली एक्स-रे सेवा मिळत नसून नागरिकांमध्ये तीव्र नाराजी व्यक्त केली जात आहे.
ग्रामीण रुग्णालयातील एक्स-रे मशीन दीड वर्षांपासून बंद असतानाही क्ष-किरण वैद्यकीय अधिकाऱ्याला दरमहा नियमित वेतन दिले जात असल्याने शासनाचा लाखो रुपयांचा निधी वाया जात असल्याचा आरोप नागरिकांकडून केला जात आहे. रुग्णालयात एक्स-रे सुविधा बंद असल्याने अपघातग्रस्त, हाडांचे फ्रॅक्चर, छातीचे आजार तसेच इतर तपासणीसाठी आलेल्या रुग्णांना खासगी रुग्णालयात जाऊन एक्स-रे काढावे लागत असून त्यामुळे त्यांना आर्थिक भुर्दंड सहन करावा लागत आहे.
यावल ग्रामीण रुग्णालयात एक्स-रे मशीन बंद असल्याने मशीन हाताळणारे क्ष-किरण वैद्यकीय अधिकारी कार्यालयीन वेळेत नियमित उपस्थित राहतात की नाही, याबाबतही रुग्णांमध्ये संशय व्यक्त केला जात आहे. तसेच संबंधित अधिकाऱ्याला येथे पात्र असे कामकाज उपलब्ध नसल्यामुळे त्यांच्या नियुक्तीबाबतही प्रश्न उपस्थित होत आहेत.
या प्रकाराकडे राजकीय व सामाजिक पदाधिकारी तसेच स्थानिक कार्यकर्त्यांचे दुर्लक्ष होत असल्याचा आरोप सामाजिक कार्यकर्ता प्रवीण डांबरे यांनी केला आहे. त्यांनी ग्रामीण रुग्णालयातील एक्स-रे मशीन तात्काळ दुरुस्त करून रुग्णांना सुविधा उपलब्ध करून देण्याची जोरदार मागणी केली आहे.
दरम्यान, जिल्ह्यात ज्या ठिकाणी एक्स-रे मशीन कार्यरत आहे त्या ठिकाणी संबंधित क्ष-किरण वैद्यकीय अधिकाऱ्याची नियुक्ती करण्यात आल्यास रुग्णांना लाभ मिळू शकतो, अशी चर्चा वैद्यकीय क्षेत्रात सुरू आहे.
यावल ग्रामीण रुग्णालय प्रशासनाने याकडे गांभीर्याने लक्ष देऊन एक्स-रे मशीन तातडीने दुरुस्त करावी, अशी मागणी नागरिकांकडून होत आहे.
