हॉस्पिटल प्रशासनाच्या ‘लिफ्ट’ खाली माणुसकी गाडली गेली का? उन्हाच्या तडाख्यात नातेवाईकांना ४-४ मजले पायपीट करण्याची शिक्षा!
जळगाव (प्रतिनिधी):
शहरातील नामांकित समजल्या जाणाऱ्या ऑर्किड हॉस्पिटलचा धक्कादायक प्रकार समोर आला आहे. मागील काही दिवसांपासून हॉस्पिटलची लिफ्ट बंद असल्याने रुग्णांच्या नातेवाईकांना नाहक त्रासाला सामोरे जावे लागत आहे. जळगावात उन्हाचा पारा ४२ अंशांच्या पार गेला असताना, कडाक्याच्या उन्हात रुग्णांच्या नातेवाईकांना चार-चार मजले पायऱ्यांनी चढ-उतार करावी लागत आहे. विशेष म्हणजे, वारंवार तक्रार करूनही हॉस्पिटल प्रशासन या गंभीर समस्येकडे जाणीवपूर्वक दुर्लक्ष करत असल्याचा आरोप संतप्त नातेवाईकांनी केला आहे.
नेमका प्रकार काय?
मिळालेल्या माहितीनुसार, ऑर्किड हॉस्पिटलमधील लिफ्ट तांत्रिक बिघाडामुळे बंद असल्याचे सांगण्यात येत आहे. मात्र, ही दुरुस्ती तातडीने करणे अपेक्षित असताना प्रशासन केवळ वेळकाढूपणा करत आहे. हॉस्पिटलमध्ये गंभीर आजाराने त्रस्त असलेले रुग्ण दाखल आहेत. त्यांच्यासाठी औषधे, जेवण आणि इतर अत्यावश्यक गोष्टी आणण्यासाठी नातेवाईकांना दिवसातून अनेक वेळा वर-खाली करावे लागते. पण लिफ्ट बंद असल्याने वयस्कर नातेवाईक आणि महिलांचे पाय दुखून बेजार झाले आहेत.
प्रशासनाची ‘मुजोरी’ आणि नातेवाईकांचा संताप
“आम्ही इथे उपचारासाठी हजारो रुपये मोजतोय, मग साध्या सोयीसुविधा का मिळत नाहीत?” असा संतप्त सवाल नातेवाईकांनी विचारला आहे. अनेक नातेवाईकांनी या संदर्भात हॉस्पिटलच्या मॅनेजमेंटकडे तक्रारी केल्या, परंतु “दुरुस्तीचे काम सुरू आहे” असे कोरडे उत्तर देऊन त्यांना परतवून लावले जात आहे. भर उन्हाळ्यात आजारी माणसांची सेवा करायची की पायऱ्या चढून स्वतःला आजारी पाडून घ्यायचे, अशा द्विधा मनस्थितीत नातेवाईक अडकले आहेत.
आक्रमक पवित्र्याची गरज
एकीकडे जिल्हा प्रशासन रुग्णांच्या सोयीसाठी खाजगी हॉस्पिटल्सना कडक नियम लावते, तर दुसरीकडे ऑर्किड सारख्या हॉस्पिटलमध्ये रुग्णांच्या नातेवाईकांची अशी थट्टा केली जात आहे. जर एखादा रुग्ण दगावला किंवा लिफ्ट अभावी कोणा नातेवाईकाची तब्येत बिघडली, तर त्याला जबाबदार कोण? असा प्रश्न आता उपस्थित होत आहे.
