८ मतांच्या चुरशीच्या लढतीत मिळवला ऐतिहासिक विजय; माजी सरपंच पुंजू कोळींच्या राजीनाम्यानंतर झाली निवडणूक
चोपडा (प्रतिनिधी):
तालुक्यातील सनपुले ता. चोपडा येथे रिक्त झालेल्या लोकनियुक्त सरपंच पदाच्या निवडणुकीत राजकीय समीकरणे बदलली असून, तरुणाईचा करिष्मा पाहायला मिळाला आहे. अवघ्या २४ ते २५ वर्षांचे तरुण उमेदवार निवृत्ती सुभाष कोळी यांनी या निवडणुकीत विजय मिळवत सनपुले ग्रामपंचायतीच्या इतिहासात एक नवा विक्रम प्रस्थापित केला आहे. अत्यंत अटीतटीच्या झालेल्या या लढतीत त्यांनी आपल्या निकटतम प्रतिस्पर्ध्याचा केवळ ८ मतांनी पराभव केला.
अशी झाली चुरशीची मतमोजणी
२०२६ ते २०२८ या कालावधीसाठी हे पद एस.टी. प्रवर्गासाठी राखीव होते. यापूर्वी लोकनियुक्त सरपंच म्हणून पुंजू अर्जुन कोळी यांची बिनविरोध निवड झाली होती, मात्र त्यांनी राजीनामा दिल्याने ही निवडणूक पार पडली. रिंगणात चार उमेदवार आपले नशीब आजमावत होते. मतमोजणीअंती निकाल खालीलप्रमाणे राहिला:
- निवृत्ती सुभाष कोळी: ३३४ मते (विजयी)
- बाळू भिका भिल: ३२६ मते
- प्रतिभा अरुण कोळी: २६० मते
- केसरबाई वामन भिल: ४७ मते
निवृत्ती कोळी यांनी ३३४ मते मिळवून निसटता पण ऐतिहासिक विजय संपादन केला. त्यांच्या या विजयामुळे गावात तरुणांमध्ये उत्साहाचे वातावरण निर्माण झाले आहे.
दिग्गजांची साथ आणि कार्यकर्त्यांची मेहनत
निवृत्ती कोळी यांच्या विजयामागे सुयोग्य नियोजन आणि ज्येष्ठ मार्गदर्शकांचा मोलाचा वाटा राहिला. माजी उपसरपंच रतीलाल संतोष कोळी आणि स्वराज्य शक्ती सेनेचे महाराष्ट्र प्रमुख समाधान बाविस्कर यांचे त्यांना खंबीर पाठबळ लाभले.
तसेच गावातील दिनकर कोळी, ज्ञानेश्वर कोळी, सुभाष कोळी, शांताराम कोळी, राजेंद्र कोळी, पांडुरंग कोळी, रमेश कोळी, दीपक कोळी, दिनेश कोळी, रामदास कोळी, गंगाराम कोळी, नितीन मोरे, उमेश मोरे, वाल्मिक मोरे, भूषण मोरे, रवींद्र सोनवणे, विजय बाविस्कर, कैलास पाटील, सोपान पाटील, विनोद विसावे, लोटन मोरे यांसह अनेक प्रमुख कार्यकर्त्यांनी अहोरात्र मेहनत घेतली.
गावाच्या विकासाचा नवा संकल्प
कमी वयात सरपंच पदाची धुरा सांभाळण्याची संधी मिळाल्याने निवृत्ती कोळी यांच्यावर अभिनंदनाचा वर्षाव होत आहे. “हा विजय माझा नसून गावातील प्रत्येक नागरिकाचा आणि मला साथ देणाऱ्या कार्यकर्त्यांचा आहे. तरुणांच्या ऊर्जेने आणि ज्येष्ठांच्या मार्गदर्शनाने सनपुले गावाचा सर्वांगीण विकास करणे हेच माझे मुख्य ध्येय असेल,” अशी प्रतिक्रिया नवनिर्वाचित सरपंच निवृत्ती कोळी यांनी विजयानंतर दिली.
