उपसंपादक:-मिलिंद जंजाळे
यावल पंचायत समिती कार्यालयात यावल–रावेर मतदारसंघाचे आमदार अमोल जावळे यांनी अचानक भेट देत प्रशासनाची धडक तपासणी केली असता धक्कादायक चित्र समोर आले. या भेटीदरम्यान गटविकास अधिकारी मंजुश्री गायकवाड या कार्यालयात गैरहजर असल्याचे उघड झाले. विशेष म्हणजे त्यांच्या गैरहजेरीबाबत कोणताही रजेचा अर्ज उपलब्ध नसल्याचेही निदर्शनास आले. या प्रकारामुळे आमदारांनी तीव्र नाराजी व्यक्त करत संबंधितांवर कारवाईची मागणी केली.
पंचायत समितीमध्ये अनेक अधिकारी व कर्मचारी आपल्या जागेवर नसल्याचे दिसून आल्याने आमदार जावळे चांगलेच संतप्त झाले. “जनतेची कामे प्रलंबित ठेवून अधिकारी बेपत्ता राहणार असतील, तर हे अजिबात सहन केले जाणार नाही,” असा इशारा त्यांनी यावेळी दिला.
स्थानिक नागरिकांकडून गटविकास अधिकारी नेहमीच कार्यालयात गैरहजर राहत असल्याच्या तक्रारी वारंवार येत असल्याचेही आमदारांनी नमूद केले. प्रशासनातील ही बेजबाबदार कार्यपद्धती थेट ग्रामीण विकासाच्या कामांवर परिणाम करणारी असल्याचा आरोप त्यांनी केला.
या गंभीर प्रकाराची तात्काळ दखल घेत आमदार अमोल जावळे यांनी जिल्हा परिषदेचे मुख्य कार्यकारी अधिकारी यांच्याशी थेट संपर्क साधून परिस्थितीची माहिती दिली व संबंधित गटविकास अधिकाऱ्यांवर शिस्तभंगाची कारवाई करण्याची मागणी केली.
अचानक झालेल्या या तपासणीमुळे पंचायत समितीतील कारभारावर मोठे प्रश्नचिन्ह निर्माण झाले असून, “कार्यालयात अधिकारी नसतील तर सर्वसामान्य नागरिकांनी न्याय कुणाकडे मागायचा?” असा संतप्त सवाल नागरिकांकडून उपस्थित केला जात आहे. प्रशासन आता यावर काय कारवाई करते याकडे सर्वांचे लक्ष लागले आहे.
