उपसंपादक :- मिलिंद जंजाळे
समाजजागृती, शिक्षण आणि समानतेचा संदेश देणारे क्रांतीसुर्य महात्मा ज्योतिराव फुले यांच्या जयंतीनिमित्त साकळी येथे उद्या दि. ११ एप्रिल २०२६ रोजी संध्याकाळी ५ वाजता भव्य जाहीर व्याख्यानाचे आयोजन करण्यात आले आहे. महात्मा ज्योतिबा फुले चौक येथे होणाऱ्या या कार्यक्रमामुळे संपूर्ण परिसरात उत्साहाचे वातावरण निर्माण झाले आहे.
या विशेष व्याख्यानासाठी प्रख्यात वक्ते श्री राजेंद्र माळी (वाघळीकर) उपस्थित राहणार असून ते “मी ज्योतिराव फुले बोलतोय!” या प्रभावी एकपात्री प्रयोगातून महात्मा फुले यांच्या क्रांतिकारी कार्याचा जिवंत आढावा सादर करणार आहेत. त्यांच्या या प्रयोगातून शोषित, वंचित आणि दुर्लक्षित घटकांसाठी लढणाऱ्या फुले यांच्या विचारांची ताकद नव्या पिढीपर्यंत पोहोचणार आहे.
महात्मा फुले यांनी दिलेला संदेश आजही तितकाच ज्वलंत आहे —
“शिक्षण हेच खरे शस्त्र आहे”
“ज्याला ज्ञान नाही तो अंध आहे”
“समाजातील अन्यायाविरुद्ध लढा देणे हीच खरी मानवता”
स्त्री शिक्षणाची मुहूर्तमेढ रोवणारे, सत्यशोधक समाजाची स्थापना करून सामाजिक समतेचा मार्ग दाखवणारे आणि जातीभेदाच्या व्यवस्थेला धैर्याने आव्हान देणारे महात्मा फुले हे खऱ्या अर्थाने आधुनिक भारताचे शिल्पकार होते.
या कार्यक्रमाचे आयोजन समस्त माळी समाज साकळी प्रेरित क्रांतीसुर्य महात्मा ज्योतिबा फुले जयंती उत्सव समितीतर्फे करण्यात आले असून, समाजातील सर्व घटकांनी या सुवर्णसंधीचा लाभ घ्यावा, असे आवाहन करण्यात आले आहे.
विद्यार्थी, युवक, महिला तसेच ग्रामस्थांनी मोठ्या संख्येने उपस्थित राहून या विचारमंथनाच्या पर्वाला यशस्वी करावे, असे आवाहन आयोजकांनी केले आहे.
साकळीमध्ये उद्या फुले विचारांचा गजर होणार, परिवर्तनाची नवी ज्योत पेटणार!
