अहिल्यानगर (प्रशांत बाफना):
अहिल्यानगर जिल्हा पोलीस दलात वरिष्ठ कार्यालयाची पूर्वपरवानगी न घेता पोलीस अधिकारी आणि अंमलदारांना परस्पर इतर शाखा किंवा विशेष पथकांमध्ये ‘संलग्न’ (Attach) करण्याच्या प्रवृत्तीला पोलीस अधीक्षक मुम्मका सुदर्शन यांनी मोठा चाप लावला आहे. अशा प्रकारे परस्पर संलग्न केलेले सर्व पोलीस अधिकारी आणि अंमलदार यांना तात्काळ मूळ नेमणुकीच्या ठिकाणी कार्यमुक्त करण्याचे थेट आदेश पोलीस अधीक्षकांनी दिले आहेत. या आदेशाचे पालन न करणाऱ्या जबाबदार वरिष्ठ अधिकाऱ्यांवर थेट शिस्तभंगाची कारवाई करून त्यांच्या गोपनीय अहवालात (CR) तशी नोंद केली जाईल, असा सज्जड इशाराही त्यांनी दिला आहे.
काय आहे नेमके प्रकरण?
अहिल्यानगर जिल्हा पोलीस दलाच्या आस्थापनेवरील काही पोलीस ठाणे/शाखा प्रभारी अधिकारी, उपविभागीय पोलीस अधिकारी (DYSP) तसेच अपर पोलीस अधीक्षक (Addl. SP) हे जिल्हा पोलीस प्रमुखांची कोणतीही पूर्वपरवानगी न घेता, केवळ मौखिक किंवा लेखी आदेशाचा आधार घेऊन आपल्या अधिनस्त पोलीस कर्मचाऱ्यांना विशेष पथक किंवा कार्यालयीन कामकाजाच्या नावाखाली परस्पर ‘अटॅच’ करून घेत असल्याचे पोलीस अधीक्षकांच्या निदर्शनास आले होते.
ही बाब प्रशासकीय कामकाजाच्या दृष्टीने अत्यंत अयोग्य आणि शासन नियमांचे उल्लंघन करणारी असल्याचे आदेशात स्पष्ट करण्यात आले आहे. यापूर्वीही २४१६ आणि २०२५ मध्ये याबाबतचे वरिष्ठ कार्यालयाचे संदर्भ व आदेश जारी करण्यात आले होते, मात्र तरीही ही प्रथा सुरूच राहिल्याने अखेर पोलीस अधीक्षकांनी हे कडक पाऊल उचलले आहे
