तालुका प्रतिनिधी : राहुल जयकर
पुणे जिल्ह्यातील नसरापूर आणि बीड जिल्ह्यातील केज येथे चिमुकल्या मुलींवर झालेल्या अमानुष अत्याचाराच्या घटनांनी संपूर्ण महाराष्ट्र सुन्न झाला आहे. या दोन्ही घटनांमधील दोषींवर तात्काळ कठोर कारवाई करून फास्ट ट्रॅक कोर्टात खटला चालवून फाशीची शिक्षा देण्यात यावी, अशी मागणी शिंदे गट शिवसेनेच्या वतीने करण्यात आली आहे. या मागणीसाठी मंगळवारी भुसावळचे प्रांताधिकारी जितेंद्र पाटील यांना निवेदन देण्यात आले.
हे निवेदन शिंदे गट शिवसेना जिल्हाप्रमुख नंदा निकम यांच्या नेतृत्वाखाली सादर करण्यात आले.
निवेदनात नमूद केल्यानुसार, नसरापूर (जि. पुणे) येथे ४ वर्षीय चिमुकल्या मुलीवर भीमराव कांबळे या नराधमाने अत्याचार करून तिच्यावर दगडाने वार करत हत्या केली. त्यानंतर पुरावा नष्ट करण्याच्या उद्देशाने मुलीचे प्रेत शेणाच्या ढिगाऱ्याखाली लपवून ठेवण्यात आले. ही घटना माणुसकीला काळीमा फासणारी असून अशा विकृत प्रवृत्ती दयेच्या लायकीच्या नसल्याचे निवेदनात नमूद करण्यात आले.
तसेच बीड जिल्ह्यातील केज येथेही ३ वर्षीय मुलीवर अत्याचार झाल्याची धक्कादायक घटना समोर आली असून, या दोन्ही घटना पुरोगामी महाराष्ट्रासाठी अत्यंत लाजिरवाण्या असल्याचे शिवसेनेने म्हटले आहे.
या प्रकरणांतील दोषींना कठोरात कठोर शिक्षा देऊन त्यांना मरेपर्यंत फाशी देण्यात यावी, तसेच फास्ट ट्रॅक कोर्टात तातडीने खटला चालवण्यात यावा, अशी आग्रही मागणी निवेदनाद्वारे करण्यात आली आहे.
यांची होती उपस्थिती :
निवेदन देताना शिवसेना जिल्हाप्रमुख नंदा निकम, उपजिल्हा संघटक मनीषा पाटील, तालुका प्रमुख वर्षा तल्लारे, मीनाक्षी गणकर, भाग्यश्री पाटील, ललिता आंबोरे, दुर्गावती यादव, ज्योती तायडे, अमिता निकम, रोहिणी तायडे, रूपाली चौधरी, मनीषा खडसे, युवा सेना जिल्हाप्रमुख पवन भोळे, उपतालुका प्रमुख सुरेश कोल्हे, युवासेना अल्पसंख्यांक जिल्हा उपप्रमुख हमीद शेख, अनिकेत जैन, सागर भोसले यांच्यासह मोठ्या संख्येने शिवसैनिक उपस्थित होते.
