चोपडा (प्रतिनिधी): वनविभागाच्या राखीव जमिनीवर बेकायदेशीरपणे ताबा मिळवण्याचा प्रयत्न करणाऱ्या दोन सराईत इसमांना वनविभागाने रंगेहात पकडून त्यांच्यावर गुन्हा दाखल केला आहे. या कारवाईत आरोपींकडून सुमारे ३.५ लाख रुपये किमतीचा ट्रॅक्टर आणि इतर साहित्य जप्त करण्यात आले आहे. वनविभागाच्या या धडक कारवाईमुळे परिसरातील भूमाफियांचे धाबे दणाणले आहेत.
मध्यरात्रीची थरारक कारवाई:
मिळालेल्या गोपनीय माहितीच्या आधारे, २६ मे रोजी मध्यरात्री चोपडा वनक्षेत्रातील चौगाव जंगल परिसर (कंपार्टमेंट नंबर २६०) येथे वनविभागाचे पथक पायी गस्त घालत होते. रात्रीच्या अंधारात ट्रॅक्टरचा आवाज आल्याने पथकाने त्या दिशेने कूच केली. तेथे दोन जण राखीव जंगलाच्या जमिनीवर बेकायदेशीरपणे नांगरणी करून कब्जा करण्याचा प्रयत्न करत असताना आढळून आले.
आरोपींची नावे आणि जप्त मुद्देमाल:
वनविभागाने तत्परता दाखवत आरोपी लक्ष्मण बुधा भिल्ल (रा. रामपूर-वैजापूर) आणि ट्रॅक्टर चालक राकेश जगदीश बरेला (रा. घोडसगाव, चोपडा) यांना ताब्यात घेतले. घटनास्थळावरून ५०५० ई (John Deere) कंपनीचा ट्रॅक्टर आणि नांगर असा एकूण ३.५ लाख रुपयांचा मुद्देमाल जप्त करून तो चोपडा येथील वनविभागाच्या कार्यालयात जमा करण्यात आला आहे.
पुढील कडक पावले:
आरोपींवर भारतीय वन कायदा, १९२७ च्या कलम २६(१)D, H आणि कलम ५२(१) अंतर्गत गुन्हा (गुन्हा रजि. नं. ०१/२०२६) दाखल करण्यात आला असून, त्यांना चोपडा न्यायदंडाधिकाऱ्यांसमोर हजर करण्यात येणार आहे. ही कारवाई उपवनसंरक्षक प्रथमेश वाघ, सहाय्यक वनसंरक्षक महेंद्रकुमार पाटील यांच्या मार्गदर्शनाखाली वनक्षेत्रपाल बी. के. थोरात आणि त्यांच्या संपूर्ण टीमने केली.
वनविभागाचा इशारा: “चोपडा वनक्षेत्रात कोणत्याही प्रकारच्या बेकायदेशीर अतिक्रमणाला किंवा वृक्षतोडीला थारा दिला जाणार नाही. निसर्गाचे नुकसान करणाऱ्यांवर कठोर कायदेशीर कारवाई केली जाईल. जंगलाचे रक्षण करण्यासाठी नागरिकांनी सहकार्य करावे आणि काही संशयास्पद आढळल्यास तात्काळ टोल फ्री नंबर १९२६ वर संपर्क साधावा.”
— बी. के. थोरात, वनक्षेत्र अधिकारी, चोपडा.
