रावेर तालुका (प्रतिनिधी ) – पाल वनक्षेत्रातील गारबर्डी परिमंडळातील कक्ष क्रमांक 32 मध्ये दिनांक 25 मार्च 2026 रोजी अवैधरित्या डिंक संकलन व वाहतूक करणाऱ्या चौघांवर वनविभागाने धडक कारवाई करत त्यांना अटक केली. या कारवाईत 110 किलो धावडा डिंक जप्त करण्यात आला.अटक करण्यात आलेल्यांमध्ये गणदास गबू डुडवे (वय 38), अमित सुजाण मोरे (वय 21), सावन रणजित मोरे (वय 24) हे सर्व रा. मेंढागड, जि. खरगोन तसेच हेमराज होरपाल चव्हाण (वय 22, रा. मांडवखेडा, जि. खरगोन) यांचा समावेश आहे.
पुढील चौकशीत पाल येथील एका व्यापाऱ्याच्या अवैध गोडाऊनवर वनविभागाने धाड टाकली. या धाडीत धावडा, सलाई व कड प्रजातीचा एकूण 7500 किलो डिंक जप्त करण्यात आला असून त्याची अंदाजित किंमत सुमारे 15 लाख रुपये आहे.कारवाईदरम्यान MP10ZA8140 क्रमांकाची शाईन कंपनीची गाडी तसेच MH19N-5308 क्रमांकाची हिरो होंडा स्प्लेंडर दुचाकी जप्त करण्यात आली.या प्रकरणी आरोपींवर भारतीय वन अधिनियम 1927 तसेच वन्यजीव संरक्षण अधिनियम 1972 अंतर्गत गुन्हा दाखल करण्यात आला आहे.
ही कारवाई उपवनसंरक्षक कृष्णा भवर व सहा वनसंरक्षक सत्यजित निकत यांच्या मार्गदर्शनाखाली वनपरिक्षेत्र अधिकारी शीतल नगराळे यांच्या नेतृत्वाखालील पथकाने केली. कारवाईत वनपाल संभाजी सूर्यवंशी, मोहसीन तडवी, रणधीर काटे, संजय बारेला, जगदीश बारेला, राजमल बारेला, सकीना तडवी, धनाबाई भादले, सविता बारेला, दीपक बारेला, मुकेश तडवी, आकाश बारेला तसेच पोलीस कॉन्स्टेबल जगदीश पाटील व ईश्वर चव्हाण यांनी सहभाग घेतला.या कारवाईसाठी रावेर येथील पोलीस निरीक्षक डॉ. विशाल जयस्वाल यांचे विशेष सहकार्य लाभले.
