कार्यकारी संपादक :- प्राजक्ता तायडे
यावल तालुक्यातील कोरपावली हे गाव प्राथमिक आरोग्य केंद्र सावखेडा सिम अंतर्गत येत असून, येथे बोगस डॉक्टर सर्रासपणे वैद्यकीय व्यवसाय करत असल्याचा गंभीर प्रकार समोर आला आहे. काही वर्षांपूर्वी तालुका आरोग्य अधिकाऱ्यांच्या पथकाने या बोगस डॉक्टरवर कारवाई केली होती. मात्र कारवाईनंतरही तोच डॉक्टर आजही खुलेआम रुग्णांवर उपचार करत असल्याने आरोग्य विभागाच्या कार्यक्षमतेवर मोठे प्रश्नचिन्ह निर्माण झाले आहे.
स्थानिक नागरिकांच्या माहितीनुसार, संबंधित बोगस बंगाली डॉक्टर कोणतीही अधिकृत वैद्यकीय पदवी नसताना उपचार करत असून गावकऱ्यांच्या जीवाशी खेळ सुरू आहे. वारंवार तक्रारी करूनही ठोस आणि कायमस्वरूपी कारवाई होत नसल्याने नागरिकांमध्ये संताप वाढत आहे.
विशेष म्हणजे, प्राथमिक आरोग्य केंद्र सावखेडा सिम अंतर्गत हा प्रकार सुरू असताना संबंधित यंत्रणेचे दुर्लक्ष का होत आहे, असा सवाल उपस्थित केला जात आहे. नियमित तपासणी आणि देखरेख होत नाही का, की जाणीवपूर्वक दुर्लक्ष केले जात आहे, याबाबत चर्चा रंगू लागली आहे.
दरम्यान, तालुका आरोग्य अधिकाऱ्यांच्या भूमिकेबाबतही संशय व्यक्त केला जात आहे. काही नागरिकांमध्ये अशी चर्चा आहे की, या बोगस डॉक्टरकडून हप्ते घेऊन त्याला संरक्षण दिले जात आहे का? जर तसे नसेल तर कारवाईनंतरही व्यवसाय सुरू कसा, असा थेट प्रश्न उपस्थित होत आहे.
आरोग्य व्यवस्थेवरील विश्वास टिकवण्यासाठी संबंधित बोगस डॉक्टरवर तात्काळ कठोर कारवाई करणे, क्लिनिक सील करणे तसेच जबाबदार अधिकाऱ्यांची चौकशी करण्याची मागणी जोर धरत आहे.
नागरिकांची मागणी :
बोगस डॉक्टरवर कायमस्वरूपी कठोर कारवाई
क्लिनिक तात्काळ सील करणे
प्राथमिक आरोग्य केंद्र स्तरावर जबाबदारी निश्चित करणे
आरोग्य विभागाच्या भूमिकेची स्वतंत्र चौकशी
दोषी आढळल्यास अधिकाऱ्यांवर कारवाई
कोरपावलीतील हा प्रकार ग्रामीण भागातील बोगस डॉक्टरांच्या वाढत्या जाळ्याचे गंभीर चित्र समोर आणत आहे. आता प्रशासनाने तातडीने लक्ष देऊन ठोस पावले उचलणे गरजेचे असल्याचे नागरिकांचे म्हणणे आहे.
