उपसंपादक : मिलिंद जंजाळे
साकळी : शेतीत नावीन्य, प्रयोगशीलता आणि जिद्दीच्या बळावर मोठे यश संपादन करणारे साकळी येथील प्रगतिशील शेतकरी दीपक रमेश महाजन यांना प्रतिष्ठेचा ‘कृषीसेवक’ राज्यस्तरीय पुरस्कार प्रदान करण्यात आला आहे. रावेर येथे आयोजित भव्य कार्यक्रमात आमदार अमोलदादा जावळे व जैन इरिगेशनचे केळी तज्ज्ञ के. बी. पाटील यांच्या हस्ते त्यांचा सन्मान करण्यात आला. या गौरवामुळे साकळी गावाच्या शिरपेचात मानाचा तुरा रोवला गेला आहे.
साप्ताहिक कृषीसेवकच्या वर्धापन दिनानिमित्त कृषी क्षेत्रात उल्लेखनीय कामगिरी करणाऱ्या भूमिपुत्रांचा राज्यस्तरीय सन्मान करण्यात आला. यावेळी व्यासपीठावर शेतकरी नेते रविकांत तुपकर यांच्यासह विविध क्षेत्रातील मान्यवर उपस्थित होते.
दीपक महाजन यांनी पारंपरिक शेतीला आधुनिक तंत्रज्ञानाची जोड देत एक्स्पोर्ट दर्ज्याची केळी उत्पादन घेऊन आपली वेगळी ओळख निर्माण केली आहे. केळीबरोबरच त्यांनी रेशीम शेतीतही उल्लेखनीय उत्पादन घेतले असून जैविक शेतीचे तंत्र आत्मसात करून प्रत्यक्ष शेतात यशस्वी प्रयोग राबवले आहेत. कमी खर्चात अधिक उत्पन्न आणि दर्जेदार उत्पादन हा त्यांचा शेतीचा मूलमंत्र ठरला आहे.
शेतीत सातत्याने नवनवीन प्रयोग, पीक व्यवस्थापनातील शास्त्रीय दृष्टिकोन आणि बाजारपेठेचा अभ्यास यामुळे दीपक महाजन हे परिसरातील शेतकऱ्यांसाठी मार्गदर्शक ठरत आहेत. अनेक शेतकरी त्यांच्या शेतीला भेट देऊन मार्गदर्शन घेत आहेत.
प्रगतिशील शेतकरी रमेश रामजी महाजन यांचा समृद्ध शेतीचा वारसा पुढे नेत दीपक महाजन यांनी आधुनिकतेची जोड दिली आहे. त्यांच्या या यशामुळे कुटुंबासह संपूर्ण गावात आनंदाचे वातावरण असून विविध स्तरांतून त्यांच्यावर अभिनंदनाचा वर्षाव होत आहे.
हा सन्मान म्हणजे केवळ एका शेतकऱ्याचा गौरव नसून, प्रयोगशील शेतीच्या दिशेने टाकलेले प्रेरणादायी पाऊल असल्याची भावना व्यक्त केली जात आहे.
