उपसंपादक :- मिलिंद जंजाळे
यावल : यावल येथील पोलिस स्टेशनमध्ये अत्याधुनिक सुविधा असलेला आणि आकर्षक अशा रचनेत उभारण्यात आलेला ‘हिरकणी कक्ष’ आता पूर्णत्वास आला असून, या कक्षामुळे पोलिस ठाण्याच्या कामकाजात एक सकारात्मक आणि विश्वासार्ह बदल घडून आला आहे. विशेषतः महिला व बालकांच्या सुरक्षिततेच्या दृष्टीने हा कक्ष अत्यंत महत्त्वपूर्ण ठरणार आहे.
पोलिस निरीक्षक रंगनाथ धारबडे यांच्या मार्गदर्शनाखाली हा हिरकणी कक्ष उभारण्यात आला असून, कक्षाचे बांधकाम, रंगरंगोटी आणि अंतर्गत सजावट अत्यंत सुबक व आकर्षक पद्धतीने करण्यात आली आहे. कक्षामध्ये गोपनीयता, सुरक्षितता आणि सुसंवाद यांना प्राधान्य देण्यात आले आहे, ज्यामुळे तक्रारदार महिलांना व बालकांना भीतीमुक्त वातावरणात आपली समस्या मांडता येणार आहे.
या हिरकणी कक्षाचे वैशिष्ट्य म्हणजे त्याची आधुनिक रचना, स्वच्छता, आरामदायी बैठक व्यवस्था आणि सुसज्ज सुविधा. त्यामुळे पोलिस स्टेशनमध्ये येणाऱ्या नागरिकांचे लक्ष आपोआप या कक्षाकडे वेधले जात आहे. अनेक नागरिकांनी या उपक्रमाचे कौतुक करत पोलिस प्रशासनाच्या संवेदनशीलतेची दखल घेतली आहे.
महिलांविरुद्ध वाढत्या गुन्ह्यांच्या पार्श्वभूमीवर अशा कक्षांची उभारणी ही काळाची गरज बनली असून, यावल पोलिस स्टेशनने घेतलेले हे पाऊल निश्चितच आदर्शवत ठरणारे आहे. ‘हिरकणी कक्ष’ केवळ एक खोली नसून, तो महिलांच्या सन्मान, सुरक्षितता आणि न्यायाच्या विश्वासाचा एक मजबूत आधार ठरत आहे.
यामुळे यावल पोलिस प्रशासनाने नागरिकांमध्ये विश्वास निर्माण करत, लोकाभिमुख पोलिसिंगचा एक उत्कृष्ट नमुना सादर केला आहे.
