उपसंपादक :-मिलिंद जंजाळे
यावल येथे आदिवासी समाजाचे आराध्य दैवत मानले जाणारे भगवान एकलव्य यांची जयंती निमित्त शबरीमाता आदिवासी मित्र मंडळ, यावल यांच्या वतीने सालाबादप्रमाणे प्रतिमापूजनाचा भव्य कार्यक्रम उत्साहात पार पडला. शहरात भक्तीमय वातावरणात पूजन, सत्कार आणि पारंपरिक वाद्यांच्या गजरात मिरवणूक काढण्यात आली.
कार्यक्रमाची सुरुवात प्रतिमापूजनाने झाली. यावेळी मान्यवरांच्या हस्ते भगवान वीर एकलव्य यांच्या प्रतिमेचे पूजन करून आदरांजली अर्पण करण्यात आली. त्यानंतर उपस्थित मान्यवर व समाजबांधवांचा “फूल नाही तर फुलाची पाकळी” या भावनेतून स्वागत व सत्कार करण्यात आला.
या सोहळ्यास यावल शहरातील विद्यमान व माजी नगरसेवक, विविध सामाजिक क्षेत्रातील पदाधिकारी तसेच भारतीय जनता पार्टी तालुकाप्रमुख उपस्थित होते. आदिवासी भिल समाज बांधवांनी मोठ्या संख्येने सहभाग नोंदवत कार्यक्रमाची शोभा वाढवली.
पूजनानंतर शहरातून पारंपरिक ढोल-ताशे व आदिवासी वाद्यांच्या निनादात भव्य मिरवणूक काढण्यात आली. मिरवणुकीदरम्यान युवकांचा उत्साह, पारंपरिक वेशभूषा आणि घोषणांनी संपूर्ण परिसर दुमदुमून गेला. विशेष म्हणजे आदिवासी महिलांचाही सहभाग लक्षणीय होता.
कार्यक्रमास डॉ. कुंदन फेगडे, हेमराज फेगडे, नंदा काकू महाजन, शुभांगी सविता, सविता नन्नवरे, योगेश चौधरी, रुबाबदादा तडवी, सागर चौधरी, सागर भाऊ कोळी, भरत भाऊ पाटील, विलास भाऊ भास्कर, मुकेश भाऊ कोळी, डॉ. विवेक अडकमोल, रवींद्र वाघ, रोशन येवले, विजय ननवरे यांच्यासह अनेक मान्यवर व कार्यकर्ते उपस्थित होते.
पंचक्रोशीतील आदिवासी भिल्ल समाज बांधव मोठ्या संख्येने मिरवणुकीत सहभागी झाल्याने यंदाची एकलव्य जयंती यावलमध्ये विशेष उत्साहात आणि दिमाखात साजरी झाल्याचे चित्र पाहायला मिळाले.
