तालुका प्रतिनिधी : राहुल जयकर
नायगाव : सातपुडा माध्यमिक विद्यालय, नायगाव येथे महाराष्ट्र नवनिर्माण विद्यार्थी सेनेकडून विद्यार्थ्यांच्या सर्वांगीण विकासासाठी लेझीम संचाचे वाटप करण्यात आले. पारंपरिक क्रीडा आणि सांस्कृतिक वारसा जपणे तसेच विद्यार्थ्यांमध्ये शारीरिक तंदुरुस्ती व एकात्मता वृद्धिंगत करणे, हा या उपक्रमाचा मुख्य उद्देश असल्याचे आयोजकांनी सांगितले.
या कार्यक्रमाला महाराष्ट्र नवनिर्माण विद्यार्थी सेना रावेर लोकसभा जिल्हाध्यक्ष कल्पेश पवार, रुपेश तेली व पंकज कोळी हे मान्यवर उपस्थित होते. लेझीम संच स्वीकारताना शाळेचे मुख्याध्यापक श्री. योगराज नायडे, उपशिक्षक श्री. विकास सूर्यवंशी, श्री. पी. व्ही. बोबडे, श्री. मनोज मोरे, तडवी सर तसेच सर्व शिक्षकवृंद आणि विद्यार्थी मोठ्या संख्येने उपस्थित होते.
मान्यवरांनी विद्यार्थ्यांना पारंपरिक खेळांचे महत्त्व, शारीरिक व मानसिक आरोग्यासाठी नियमित व्यायामाची गरज आणि संस्कृती जपण्याचे मूल्य याबद्दल मार्गदर्शन केले. लेझीम संच मिळाल्याने विद्यार्थ्यांमध्ये उत्साहाचे वातावरण निर्माण झाले असून या संचाचा उपयोग शाळेतील दिंडी, रॅली, क्रीडा स्पर्धा तसेच विविध सांस्कृतिक कार्यक्रमांमध्ये केला जाणार आहे.
भविष्यातही विद्यार्थी सेनेतर्फे अशा अनेक उपयुक्त आणि विद्यार्थीहिताच्या उपक्रमांचे आयोजन सातत्याने करण्यात येणार असल्याचे जिल्हाध्यक्ष कल्पेश पवार यांनी सांगितले.
