साकळीतील जिल्हा परिषद उर्दू शाळेत प्रजासत्ताक दिन देशभक्तीच्या जल्लोषात साजरा विद्यार्थ्यांच्या देशभक्ती गीतांनी परिसर दुमदुमला,स्वाभिमान-अभिमानाचे दर्शन

उपसंपादक:- मिलिंद जंजाळे
साकळी (ता. यावल) येथील जिल्हा परिषद उर्दू शाळेत 77 वा प्रजासत्ताक दिन मोठ्या उत्साहात, देशभक्तीच्या आणि राष्ट्रीय स्वाभिमानाच्या वातावरणात साजरा करण्यात आला. शाळेचा संपूर्ण परिसर तिरंग्याने सजवण्यात आला होता.
कार्यक्रमाची सुरुवात ध्वजारोहणाने करण्यात आली. यानंतर शाळेतील विद्यार्थी व विद्यार्थिनींनी सादर केलेल्या देशभक्तीपर गीतांनी उपस्थितांचे मन जिंकले. “वंदे मातरम्”, “सारे जहाँ से अच्छा” यासारख्या गीतांवर विद्यार्थ्यांनी उत्स्फूर्त सहभाग घेत देशाविषयीचा अभिमान व स्वाभिमान व्यक्त केला.
विद्यार्थ्यांच्या शिस्तबद्ध संचलनाने व सांस्कृतिक कार्यक्रमांनी उपस्थितांमध्ये देशप्रेमाची भावना अधिक दृढ केली. लहानग्यांच्या आत्मविश्वासपूर्ण सादरीकरणाने कार्यक्रमाला विशेष रंगत आली.
या प्रसंगी प्रमुख पाहुणे म्हणून साकळी येथील प्रगतशील शेतकरी तथा माजी उपसरपंच वासिम खान हाजी आसिफ खान, शाळेचे मुख्याध्यापक रहीस खान महेमूद खान, शाळा व्यवस्थापन समिती अध्यक्ष शहीन शाह सलीम शाह,शिक्षक तज्ज्ञ सुफियान खान,शाळा व्यवस्थापन समिती सदस्य शेख अल्ताफ शेख गुलाम,शाहरुख खान तस्लिम खान, शेख मोहसीन शेख हारून यांच्यासह सर्व शाळा व्यवस्थापन सदस्य, शिक्षकवृंद तसेच गावातील नागरिक मोठ्या संख्येने उपस्थित होते.
प्रमुख पाहुण्यांनी विद्यार्थ्यांना मार्गदर्शन करताना सांगितले की, “देशाची घटना, लोकशाही मूल्ये व राष्ट्रीय एकात्मता जपण्याची जबाबदारी भावी पिढीवर आहे. विद्यार्थी हेच उद्याचे राष्ट्रनिर्माते आहेत.”
कार्यक्रमाच्या यशस्वी आयोजनाबद्दल शाळा व्यवस्थापन, शिक्षकवृंद व विद्यार्थ्यांचे उपस्थितांनी कौतुक केले. देशभक्ती, शिस्त आणि एकतेचा संदेश देणारा हा प्रजासत्ताक दिन सोहळा साकळीकरांसाठी स्मरणीय ठरला.