शालेय समिती उपाध्यक्ष सौ. ताई सोनवणे यांच्या हस्ते ध्वजारोहण; वृक्षारोपणाने कार्यक्रमाची सांगता
भुसावळ: तालुक्यातील पिंपळगाव बुद्रूक येथील प्राथमिक विद्या मंदिर शाळेत भारताचा ७७ वा प्रजासत्ताक दिन अत्यंत उत्साहात आणि देशभक्तीपर वातावरणात साजरा करण्यात आला. यावेळी शालेय समितीच्या उपाध्यक्ष सौ. ताई विलास सोनवणे यांच्या हस्ते ध्वजारोहण करण्यात आले.
ध्वजारोहण आणि राष्ट्रगीतानंतर परिसरात दिलेल्या देशभक्तीपर घोषणांनी आणि गीतांनी संपूर्ण वातावरण भारावून गेले होते. शाळेतील विद्यार्थ्यांनी यावेळी देशभक्तीपर गीते आणि विविध सांस्कृतिक कार्यक्रम सादर केले, ज्याला उपस्थित मान्यवरांकडून आणि ग्रामस्थांकडून उत्स्फूर्त प्रतिसाद मिळाला. विशेष म्हणजे, आदिवासी समाजातील महिला प्रतिनिधीला ध्वजारोहणाचा मान देऊन शाळेने एक आदर्श निर्माण केल्याबद्दल आयोजकांचे आणि ग्रामस्थांचे विशेष कौतुक करण्यात आले.
या सोहळ्यासाठी गावचे सरपंच ज्ञानदेव धनसिंग मावळे, ग्रामपंचायत अधिकारी जगदीश इंगळे, सदस्य प्रकाश पाटील, सामाजिक कार्यकर्ते प्रमोद सरोदे तसेच मोठ्या संख्येने ग्रामस्थ उपस्थित होते. शाळेचे मुख्याध्यापक आणि सर्व शिक्षक वृंदाने कार्यक्रमाचे नियोजन केले होते.
प्रजासत्ताक दिनाचे औचित्य साधून वृक्षारोपण
२६ जानेवारीचे औचित्य साधून ग्रामपंचायतीच्या पुढाकाराने शाळेच्या समोरील भागात वृक्षारोपणाचा कार्यक्रम राबविण्यात आला. यावेळी ग्रामपंचायत अधिकारी जगदीश इंगळे आणि उपस्थित नागरिकांच्या हस्ते रोपे लावण्यात आली. संपूर्ण कार्यक्रम शांततेत आणि यशस्वीरित्या पार पडला.
