शिर्डी (प्रतिनिधी):
दिनांक 3 नोव्हेंबर रोजी शिर्डी येथील जागतिक ख्याती असलेल्या साईबाबा मंदिराच्या एक नंबर गेट परिसरात अचानक भीषण आग लागल्याने काही काळ संपूर्ण परिसरात एकच गोंधळ उडाला. भाविकांच्या गर्दीमुळे परिस्थिती अधिक गंभीर होण्याची शक्यता होती. मात्र अग्निशमन दलाच्या तात्काळ उपस्थितीमुळे आणि कर्मचार्यांच्या तत्पर कारवाईमुळे मोठा अनर्थ टळला.
साईबाबांच्या दर्शनासाठी नेहमीप्रमाणे आजही हजारो भाविकांची गर्दी होती. त्याच दरम्यान अचानक गेट नंबर एकजवळील दुकानांच्या बाजूने धुराचे लोट उठू लागले आणि काही क्षणांतच आगीने रौद्ररूप धारण केले. भाविकांमध्ये भीतीचे वातावरण पसरले. काही भाविकांनी तत्काळ धाव घेऊन मंदिर प्रशासनाला तसेच पोलिसांना कळविले.
घटनास्थळी शिर्डी ग्रामपंचायत अग्निशमन दल, पोलिस विभाग व साईबाबा संस्थान सुरक्षा कर्मचारी अल्पावधीत दाखल झाले. सुमारे तासाभराच्या प्रयत्नानंतर आग नियंत्रणात आणण्यात आली. प्राथमिक माहितीनुसार काही दुकाने आणि साहित्य जळून खाक झाले असून सुदैवाने कोणतीही जीवितहानी झालेली नाही.
अग्निशमन दलाच्या अधिकाऱ्यांनी सांगितले की, आगीचे नेमके कारण अद्याप समोर आले नसून प्राथमिक अंदाजानुसार शॉर्टसर्किटमुळे आग लागली असावी. घटनास्थळी तपास सुरू आहे.
दरम्यान, मंदिर परिसरातील सुरक्षेच्या दृष्टीने मोठा प्रश्न पुन्हा एकदा ऐरणीवर आला आहे. भाविकांच्या सुरक्षिततेसाठी आणि मंदिर परिसरातील व्यापारी आस्थापनांमध्ये अग्निसुरक्षा नियमांचे काटेकोर पालन आवश्यक असल्याचे नागरिकांनी आणि भाविक संघटनांनी मत व्यक्त केले आहे.
“साईबाबा मंदिर परिसर हे लाखो भाविकांचे श्रद्धास्थान आहे. अशा ठिकाणी अग्निशमन सुरक्षेकडे हलगर्जीपणा असू नये,” अशी तीव्र प्रतिक्रिया स्थानिकांनी व्यक्त केली आहे.
साईबाबा संस्थान प्रशासनाने तातडीने चौकशीचे आदेश दिले असून, नुकसानाचे पंचनामे सुरू आहेत.
शिर्डीतील या घटनेने सगळ्या राज्याचे लक्ष पुन्हा एकदा साईबाबा मंदिर परिसरातील सुरक्षेकडे वेधले आहे!
