सावदा (ता. रावेर): प्राजक्ता तायडे
दुधासारख्या पवित्र व्यवसायाचा आडोसा घेऊन गेल्या अनेक वर्षांपासून सुरू असलेल्या अवैध दारू तस्करीचा सावदा पोलिसांनी पर्दाफाश केला आहे. सावदा येथील सहकारी दूध उत्पादक संघ येथे पोलीस निरीक्षक विशाल पाटील यांच्या पथकाने धाडसी कारवाई करत मोठ्या प्रमाणावर दारूचा साठा जप्त केला. या प्रकरणी मुख्य आरोपी नितिन बेंडाळे आणि त्याच्या सहकाऱ्यांवर गुन्हे दाखल करण्यात आले आहेत.
सूत्रांकडून मिळालेल्या अत्यंत गोपनीय माहितीनुसार, सावदा शहरातील सरकारी दूध डेअरीच्या आवारात दुधाच्या संकलनाऐवजी अवैध दारूची साठवणूक आणि विक्री केली जात होती. पोलीस निरीक्षक विशाल पाटील यांनी या माहितीची खातरजमा करून आपल्या पथकासह डेअरीवर अचानक छापा टाकला. यावेळी पोलिसांना तिथे दुधाच्या कॅन आणि साहित्यासोबतच विदेशी व देशी दारूचा मोठा साठा आढळून आला.
प्राथमिक चौकशीत असे समोर आले आहे की, हा तस्करीचा प्रकार गेल्या अनेक वर्षांपासून छुप्या पद्धतीने सुरू होता. दुधाच्या गाड्यांमधून किंवा डेअरीच्या नावाखाली संशयास्पद हालचालींकडे कोणाचे लक्ष जाणार नाही, याचा फायदा आरोपींनी घेतला. रावेर तालुक्यातील सावदा सारख्या महत्त्वाच्या गावात, तोही शासकीय निगराणीत असलेल्या संस्थेत असा प्रकार सुरू असल्याने परिसरात एकच खळबळ उडाली आहे.
या छाप्यानंतर पोलिसांनी घटनास्थळावरून मुद्देमाल जप्त केला असून, मुख्य आरोपी नितिन बेंडाळे याच्यासह त्याच्या इतर सहकाऱ्यांविरुद्ध पोलीस ठाण्यात विविध कलमान्वये गुन्हा दाखल करण्यात आला आहे. या रॅकेटमध्ये आणखी कोणाचे हात गुंतलेले आहेत का, याचा तपास आता पोलीस करत आहेत.
