भडगाव (जळगाव): विठ्ठलराव मराठे -भडगाव नगर परिषदेच्या (होऊ घातलेल्या नगरपालिकेच्या) बहुप्रतिक्षित लोकनियुक्त नगराध्यक्ष पदाच्या निवडणुकीसाठी आज आरक्षण जाहीर होताच, राजकीय वातावरण तापले आहे. हे पद एसटी महिला गटासाठी आरक्षित झाल्यामुळे, भडगाव पंचायत समितीच्या माजी सभापती आणि विद्यमान नगरसेविका सुशीला शांताराम पाटील यांनी आपली उमेदवारी जाहीर करत जोरदार दावेदारी सिद्ध केली आहे.
जनतेच्या आग्रहास्तव सुशीला पाटील यांनी निवडणुकीसाठी कंबर कसली असून, त्यांची राजकीय कारकीर्द पाहता त्या एक प्रबळ दावेदार मानल्या जात आहेत.
सुशीला पाटील यांचा राजकीय प्रवास: जमेची बाजू
- भडगाव ग्रामपंचायत सदस्य म्हणून त्यांनी आपल्या राजकीय प्रवासाला सुरुवात केली.
- त्यानंतर त्यांनी भडगाव पंचायत समितीच्या माजी सभापती म्हणून कार्यभार सांभाळला.
- सध्या त्या भडगाव पेठ प्रभागातून विद्यमान नगरसेविका आहेत.
कायदेतज्ञ असलेले त्यांचे पती ॲडव्होकेट शांताराम भिला पाटील यांच्या निधनानंतर सुशीला पाटील काही काळ दुःखात होत्या. मात्र, आजच्या एसटी महिला आरक्षणामुळे आणि जनतेच्या मागणीमुळे, त्यांनी पुन्हा एकदा राजकारणात सक्रिय होत नगराध्यक्षपदासाठी निवडणूक लढण्याचा निर्धार केला आहे.
भडगावच्या जनतेसाठी विकासाची दृष्टी घेऊन त्या निवडणुकीच्या रिंगणात उतरण्यास सज्ज झाल्या आहेत. यामुळे भडगाव नगरपालिकेच्या निवडणुकीत एक रोमहर्षक लढत पाहायला मिळण्याची चिन्हे आहेत.
