उपसंपादक :- मिलिंद जंजाळे
यावल वन विभागाच्या पश्चिम परिक्षेत्राने केलेल्या धाडसी कारवाईत विनापरवाना चोरट्या मार्गाने सागवान लाकडाची वाहतूक करणाऱ्या चारचाकी वाहनावर मोठी कारवाई करण्यात आली असून लाखोंचा मुद्देमाल जप्त करण्यात आला आहे.
वन विभागाच्या सूत्रांकडून मिळालेल्या गुप्त माहितीनुसार, नायगाव–किनगाव मार्गावर रात्री सुमारे १० वाजेच्या सुमारास सापळा रचण्यात आला. यावेळी संशयित महिंद्रा पिकअप (MH 04 EL 7658) वाहन थांबवून तपासणी केली असता प्लास्टिक क्रेटखाली लपवून ठेवलेले सागवान जातीचे लाकूड आढळून आले.
तपासणीत सागवानाचे ०.१७७ घनमीटर (८ नग) लाकूड जप्त करण्यात आले असून त्याची किंमत सुमारे ₹3,939/- इतकी आहे. तसेच जप्त करण्यात आलेल्या वाहनाची किंमत ₹5,25,000/- असून एकूण ₹5,28,939/- चा मुद्देमाल वन विभागाने ताब्यात घेतला आहे.
कारवाईदरम्यान वाहन चालकाने अंधाराचा फायदा घेत घटनास्थळावरून पळ काढला. जप्त केलेले वाहन व लाकूड शासकीय काष्ठ आगार, यावल येथे जमा करण्यात आले आहे.
या प्रकरणी वनपरिक्षेत्र अधिकारी (संरक्षण व अतिक्रमण निर्मूलन) यांनी प्रथम अहवाल क्र. ०६/२०२६, दि. ११ एप्रिल २०२६ नोंदवून भारतीय वन अधिनियम १९२७ च्या कलम ४१(२)(ब) अंतर्गत गुन्हा दाखल केला आहे.
ही धडक कारवाई उपवनसंरक्षक सौरिष सहाय व सहाय्यक वनसंरक्षक समाधान पाटील यांच्या मार्गदर्शनाखाली पार पडली.
कारवाईत प्रशांत जोशी (वनपरिक्षेत्र अधिकारी, यावल पश्चिम) यांच्यासह विपुल पाटील, संजय इंडे, हरीपुरा परिमंडळ अधिकारी तसेच वनरक्षक हनुमंत सोनवणे, चेतन शेलार, अक्षय रोकडे, इंदल चव्हाण, मोहन कच्छवाह, आनंद तेली, श्रीमती सरला भोंगरे, श्रीमती सीमा भालेराव आदींचा सहभाग होता.
वन संपत्तीची चोरी रोखण्यासाठी वन विभाग सतर्क असून अशा बेकायदेशीर कृत्यांवर कठोर कारवाईचा इशारा देण्यात आला आहे.
