अहिल्यानगर/ प्रशांत बाफना
एरंडगाव समसूद (ता. शेवगाव) येथे अत्यंत धक्कादायक घटना घडली असून, पैशांच्या वादातून एका वडिलांनी आपल्या मुलीची कुऱ्हाडीने हत्या केली, तर दुसरी मुलगी जखमी झाली आहे. या प्रकरणी आरोपीला पोलिसांनी अटक केली आहे.
पोलिसांनी दिलेल्या माहितीनुसार, भारती हिने तिची मोठी बहीण मिर्चाना हिच्यासह वडिलांच्या एरंडगाव येथील घरी भेट दिली होती. ऊसतोड कामासाठी दिलेल्या पैशांवरून कुटुंबामध्ये वाद निर्माण झाला. वाद चिघळत गेल्यानंतर जयराम भोसले यांनी संतापाच्या भरात कुऱ्हाड उचलून मिर्चाना हिच्या चेहऱ्यावर व मानेवर वार केले. यात ती गंभीर जखमी होऊन मृत्यूमुखी पडली.
दरम्यान, बहिणीला वाचवण्यासाठी धावलेल्या भारती हिलाही आरोपीने मारहाण केली. या हल्ल्यात ती किरकोळ जखमी झाली आहे.
घटनेची माहिती मिळताच पोलिस पथक तात्काळ घटनास्थळी दाखल झाले. आवश्यक ती कायदेशीर प्रक्रिया पूर्ण करून आरोपी जयराम शंकर भोसले (वय ६५, रा. एरंडगाव) याला अटक करण्यात आली.
या घटनेनंतर परिसरात काही काळ तणावाचे वातावरण निर्माण झाले होते. मात्र पोलिसांनी परिस्थिती नियंत्रणात आणत परिसरात शांतता प्रस्थापित केली आहे. पुढील तपास शेवगाव पोलीस करत आहेत
