अहिल्यानगर/ प्रशांत बाफना
होळी व धुलीवंदन सणाच्या पार्श्वभूमीवर पंचक्रोशीतील गावांमध्ये वाढलेल्या अवैध दारूविक्री व इतर बेकायदेशीर धंद्यांविरोधात आठ महिला सरपंच व महिला प्रशासकांनी आक्रमक भूमिका घेत थेट शेवगाव पोलीस ठाणे येथे धडक दिली.
ग्रामपंचायत नवीन दहिफळ यांच्या नेतृत्वाखाली सादर करण्यात आलेल्या निवेदनावर पंचक्रोशीतील आठही महिला सरपंचांचे अधिकृत स्वाक्षऱ्या व शिक्के असून, गावांमध्ये वाढत्या दारूविक्रीमुळे महिला व सर्वसामान्य नागरिक त्रस्त झाल्याचे स्पष्ट नमूद करण्यात आले आहे.
महिलांचा संताप उफाळला
सणासुदीच्या काळात गावोगावी अवैध दारूची खुलेआम विक्री होत असल्याचा आरोप निवेदनात करण्यात आला आहे. सार्वजनिक ठिकाणी दारू सेवन करून गोंधळ घालणे, शिवीगाळ करणे, महिलांशी गैरवर्तन करणे तसेच तरुण पिढीला चुकीच्या मार्गावर नेणारे प्रकार वाढत असल्याने कायदा व सुव्यवस्थेचा प्रश्न गंभीर बनल्याचे महिलांनी नमूद केले.
“गावातील शांतता व महिलांचा सन्मान अबाधित राहिला पाहिजे. अवैध धंदे तात्काळ बंद झाले नाहीत, तर महिला शक्ती रस्त्यावर उतरल्याशिवाय राहणार नाही,” असा ठाम इशारा महिला सरपंचांनी दिला.
पोलिसांकडे कठोर कारवाईची मागणी
निवेदनात पुढील प्रमुख मागण्या करण्यात आल्या आहेत –
अवैध दारू विक्रेत्यांवर तात्काळ धाड टाकून गुन्हे दाखल करावेत.
सणाच्या काळात गाव परिसरात कडक पोलिस बंदोबस्त ठेवावा.
बेकायदेशीर धंदे पूर्णपणे बंद करण्यासाठी सातत्याने कारवाई करावी.
पोलीस प्रशासनाने निवेदन स्वीकारून योग्य ती कारवाई करण्याचे आश्वासन दिले आहे. मात्र आता संपूर्ण पंचक्रोशीचे लक्ष पोलिसांच्या प्रत्यक्ष कृतीकडे लागले आहे.
“महिला एकत्र आल्या तर अन्याय सहन करणार नाहीत!”
पंचक्रोशीतील महिला सरपंच व प्रशासकांनी दाखवलेली एकजूट ही गावातील अवैध धंद्यांविरोधातील मोठ्या चळवळीची नांदी ठरणार का, याकडे सर्वांचे लक्ष लागले आहे. अवैध दारूविक्री तात्काळ थांबली नाही, तर पुढील आंदोलन अधिक तीव्र करण्यात येईल, असा इशारा महिला नेतृत्वाने दिला आहे.
