उपसंपादक : मिलिंद जंजाळे
यावल तालुक्यातील साकळी ग्रामपंचायतीच्या कारभारावर सध्या गंभीर प्रश्नचिन्ह निर्माण झाले असून ग्रामसभा प्रत्यक्षात न घेता केवळ कागदोपत्री उरकल्या जात असल्याची जोरदार चर्चा गावात रंगू लागली आहे. ग्रामसभेचा कोणताही प्रचार-प्रसार न करता मोजक्या लोकांच्या उपस्थितीत प्रक्रिया पूर्ण करून नंतर रजिस्टरवर सह्या घेतल्या जात असल्याचा आरोप ग्रामस्थांकडून करण्यात येत आहे.
ग्रामसभा ही गावाच्या विकासासाठी आणि ग्रामपंचायतीच्या कामकाजावर नियंत्रण ठेवण्यासाठी सर्वात महत्त्वाची लोकशाही प्रक्रिया मानली जाते. मात्र साकळी ग्रामपंचायतीत ग्रामसभा ही केवळ औपचारिकता बनल्याचे चित्र समोर येत आहे.
ग्रामसभेचा प्रचारच नाही, नागरिक अनभिज्ञ
ग्रामसभा घेण्यापूर्वी गावात दवंडी देणे, सूचना फलकावर नोटीस लावणे, सोशल मीडियावर माहिती देणे किंवा सार्वजनिक जाहीरात करणे अपेक्षित असते. मात्र साकळी ग्रामपंचायतीकडून ग्रामसभेबाबत कोणतीही माहिती गावकऱ्यांपर्यंत पोहोचवली जात नसल्याचे नागरिकांचे म्हणणे आहे. त्यामुळे अनेक ग्रामस्थांना ग्रामसभा कधी झाली याचीही माहिती नसल्याचे समोर येत आहे.
तहकूब ग्रामसभेच्या नावाखाली सह्या?
याहून धक्कादायक बाब म्हणजे तहकूब ग्रामसभेच्या नावाखाली काही जवळच्या व्यक्तींना बोलावून रजिस्टरवर सह्या घेतल्या जात असल्याची चर्चा गावात जोर धरत आहे. अनेक नागरिकांना ठराव काय मंजूर झाले, निधी कुठे खर्च झाला याची कोणतीही माहिती नसल्याचा आरोपही ग्रामस्थांकडून करण्यात येत आहे.
ग्रामपंचायतीच्या खर्चावर प्रश्नचिन्ह
ग्रामपंचायतीच्या विविध विकासकामांवरील खर्चाबाबतही नागरिकांमध्ये मोठ्या प्रमाणात शंका व्यक्त होत आहेत. ग्रामसभेत हिशोब पारदर्शकपणे मांडला जात नसल्यामुळे निधीच्या वापरावर प्रश्नचिन्ह निर्माण झाले असल्याची भावना गावकऱ्यांमध्ये आहे.
ग्रामसभा जनजागृतीचा अभाव का?
ग्रामसभा ही गावातील सर्व नागरिकांचा सहभाग असलेली लोकशाही प्रक्रिया असताना साकळी ग्रामपंचायतीत ग्रामसभेबाबत जनजागृतीच होत नसल्याचा प्रश्न आता नागरिक उपस्थित करू लागले आहेत. ग्रामसभेबाबत माहिती न देता काही मोजक्या लोकांमध्येच निर्णय घेतले जात असल्याचा आरोप होत आहे.
पुढील ग्रामसभा जाहीर करण्याची मागणी
दरम्यान, पुढील ग्रामसभा पारदर्शक पद्धतीने व संपूर्ण गावाला माहिती देऊन आयोजित करण्यात यावी, अशी जोरदार मागणी ग्रामस्थांकडून केली जात आहे. ग्रामसभेची तारीख, वेळ आणि अजेंडा सार्वजनिकरित्या जाहीर करावा, तसेच ग्रामस्थांच्या उपस्थितीत सर्व खर्चाचा तपशील सादर करावा, अशीही मागणी होत आहे.
चौकशीची मागणी
संपूर्ण प्रकरणाची सखोल चौकशी करून जर ग्रामसभा कागदोपत्रीच दाखवल्या असतील तर संबंधित जबाबदारांवर कडक कारवाई करावी, अशी मागणी ग्रामस्थांकडून होत आहे. अन्यथा साकळी ग्रामपंचायतीच्या कारभाराविरोधात ग्रामस्थ मोठे आंदोलन उभारण्याच्या तयारीत असल्याची चर्चा देखील सुरू झाली आहे.
ग्रामसभा पारदर्शकपणे होणार की कागदोपत्रीच राहणार?
हा प्रश्न आता संपूर्ण साकळी गावात चर्चेचा विषय ठरला आहे.
