महामारीत जीवाची पर्वा न करता सेवा करणाऱ्या कर्मचाऱ्यांची उपेक्षा; कोरोना योद्ध्यांचा संताप
उपसंपादक :-मिलिंद जंजाळे
कोरोना महामारीच्या भीषण काळात स्वतःच्या जीवाची पर्वा न करता रुग्णांची सेवा करणाऱ्या कोरोना योद्ध्यांना आज मात्र रोजगारासाठी भटकंती करावी लागत असल्याची गंभीर आणि संतापजनक परिस्थिती समोर येत आहे. जीव धोक्यात घालून आरोग्य व्यवस्थेला खंबीर साथ देणाऱ्या या कोरोना योद्ध्यांना सन्मानपूर्वक हाताला काम देणे गरजेचे असल्याची तीव्र भावना आता त्यांच्या कडून व्यक्त केली जात आहे.
कोरोनाच्या काळात देशभरात आरोग्य व्यवस्था कोलमडण्याच्या मार्गावर असताना अनेक युवक-युवती, आरोग्य कर्मचारी, स्वयंसेवक आणि विविध विभागातील कर्मचाऱ्यांनी दिवस-रात्र काम करत रुग्णांची सेवा केली. संसर्गाचा धोका असतानाही त्यांनी रुग्णालये, कोविड सेंटर, तपासणी केंद्रे तसेच गावोगावी जाऊन जनजागृतीचे काम केले. अनेकांनी स्वतःचे कुटुंब दूर ठेवून रुग्णांसाठी सेवा दिली.
मात्र परिस्थिती नियंत्रणात आल्यानंतर या कोरोना योद्ध्यांकडे प्रशासनाने अक्षरशः पाठ फिरवल्याचे दिसून येत आहे. कोरोनाच्या काळात ज्यांच्या खांद्यावर आरोग्य व्यवस्थेचा मोठा भार होता, त्याच कर्मचाऱ्यांना आज कायमस्वरूपी नोकरी किंवा रोजगाराची संधी मिळत नसल्याने त्यांच्यात नाराजीचे वातावरण निर्माण झाले आहे.
कोरोना योद्ध्यांचे म्हणणे आहे की, महामारीच्या काळात सरकार आणि प्रशासनाने त्यांना पुढे करून मोठमोठ्या घोषणा केल्या. त्यांना “कोरोना योद्धा” म्हणून गौरवण्यात आले, पण आज त्या योद्ध्यांची अवस्था अत्यंत दयनीय झाली आहे. अनेक जण बेरोजगार झाले असून कुटुंबाचा उदरनिर्वाह करणे कठीण झाले आहे.
या पार्श्वभूमीवर कोरोना योद्ध्यांनी शासनाकडे ठाम मागणी केली आहे की, महामारीच्या काळातील त्यांच्या सेवेचा विचार करून त्यांना आरोग्य विभागात किंवा इतर शासकीय विभागात प्राधान्याने रोजगाराची संधी देण्यात यावी. तसेच त्यांना सन्मानपूर्वक कायमस्वरूपी काम देऊन त्यांच्या योगदानाची योग्य दखल घ्यावी.
दरम्यान, समाजातील विविध स्तरातूनही कोरोना योद्ध्यांना न्याय मिळावा अशी मागणी जोर धरू लागली आहे. ज्यांनी संकटाच्या काळात समाजाचे प्राण वाचवण्यासाठी स्वतःचा जीव धोक्यात घातला, त्यांना आज दुर्लक्षित ठेवणे ही अत्यंत दुर्दैवी बाब असल्याची प्रतिक्रिया नागरिकांकडून व्यक्त केली जात आहे.
आता शासन आणि प्रशासनाने या कोरोना योद्ध्यांच्या वेदना समजून घेत त्यांना सन्मानाने रोजगार उपलब्ध करून देण्यासाठी ठोस निर्णय घेणे अत्यंत गरजेचे असल्याचे मत सर्व स्तरातून व्यक्त होत आहे.
